මව සහ මවාගත් මව.

  සිතට සැනසීමක් අවශ්‍යනම් සිතට අසීමාන්තික ආදරයක් අවශ්‍ය නම් ගතට ආහාරයක් අවශ්‍ය නම් හදිසියේ වේදනාවක් දැනුනනම් මේ අවශ්‍යතා සියල්ල  සංසිඳුවා ගැනීමට සිටින එකම පිහිට අපේ අම්මාය. අම්මා නමැති වචනය නෙතට ගැටුනද එම රූපය අප සිතෙහි මැවුණද  දැනෙන සැනසීම වෙනයම්   දෙයකින් ලබාගත නොහැකිය. අම්මා නැමැති සිතා ගත නොහැකි ජීවිතය තම දරුවන් වෙනුවෙන් තම පවුල වෙනුවෙන් තම සැමියා වෙනුවෙන් කරන කැපකිරීම ඇයටවත් නොතේරෙන තරම් ය.

කාලයේ අවාසනාවට දිනෙන් දින අසන්නට ලැබෙන සිද්ධි සංෂිප්තයක් ගෙන බැලීමේදී  මව නමැති වටිනාකම කෙලෙසන, මවක් වීමේ ප්‍රාතිහාරය, වගකීම නොදත් ස්ත්‍රී සමාජයක් දිනෙන් දින බිහිවෙමින් පවතී. දින කිහිපයකට පමණ පෙර තම දරුවා කෝච්චියක තමා ගිය මව කියන්නා වූ කාන්තාවක් සහ පිරිමියකු පිළිබඳව වාර්තා විය. එලෙසම තම දරුවා තමා කියන දේ නොඅසා  තමාට වදදෙන බව කියා දරුණු ලෙස කුඩා දරුවෙකුට පහර දෙන සිද්ධියක් ඔබට මතක ඇත. ඒ සියලු ප්‍රවෘත්ති අලුත් කරමින් කැලණිමුල්ල ප්‍රදේශයේ කානුවක, ඉපදී වැදුම් ලේ වත් ගතින්  ඉවත්ව නොගිය අත දරුවෙකුගේ මළ සිරුරක් සොයාගෙන තිබුණි. මෙය සිත හිරිවට්ටන සිද්ධියක් වූවාය. මේ වාර්තා වන සිදුවීම් පමණි තවදුරටත් එය මතකයට ගෙන හදේ සියුම් තැන් රිද්දා ගැනීම  නොකල යුතුය.

මවට මෙසේ වූයේ කිනම් කාරණය නිසා ද? තම දරුවාගේ වකුගඩු දෙකම ගලවාගෙන තම දරුවා දෑස් ඉදිරියේම මියදෙද්දී  දෙස් දෙවොල්කර තම දරුවා නැවත ඉල්ලා සිටින අම්මාවරු අතරේ සිතෙහි කිසිදු අම්මා යන හැඟීමක් නොමැති තෙතමනයක් නොමැති අම්මාවරු යැයි කියාගන්නා පිරිසක් ද බිහි වී ඇත්තේ කිනම් කාරණය නිසා ද. මේ සිදුවීම දෙස බලා හිතේ දුකට, අනේ පව් යැයි කීම කිසිම ඵලක් නැත.රටේ   බලධරීන්, මනෝ විද්‍යාඥයින්  වෛද්‍යවරු රජය ඇතුළු සියලු දෙනා මේවායේ අග මුල සොයා තවත්  මෙවැනි සාහසික අපරාධ  පාඨකයාගේ දෙසවනෙහි තැබීමේ අවකාශය නැති කළයුතුය. මත්ද්‍රව්‍ය, ආතතිය, කාංසාව, අපේක්ෂාභංගත්වය, තනිවීම ඇතුළු තවත් ආධ්‍යාත්මික සහ භෞතික කාරනා මේ සිද්ධි සම්බන්ධව පැටලී ඇත. අම්මා යනු අම්මාමය. තවත් තවත්  මෙවැනි සිද්ධි නිසා අම්මා යන වචනයෙහි අරුත කිලිටි නො කිරීම කළ යුතුය.